వాలంటీర్లకు ఏపీ ప్రభుత్వం గుడ్ న్యూస్.. వ‌లంటీర్ల‌ను వ‌దులుకోబోమన్న సీఎం....

వాలంటీర్ల వ్యవస్థను కొనసాగిస్తామని సీఎం చంద్రబాబు నాయుడు తాజాగా హామీ ఇవ్వడంతోపాటు పెండింగ్ వేతనాలను చెల్లిస్తామని ప్రకటించారు. దీంతో వాలంటీర్లకు వేతనాలు రెట్టింపు కానున్నాయి. గత వైసిపి ప్రభుత్వం వాలంటీర్లకు గౌరవ వేతనంగా రూ.5000 ఇచ్చేది. కూటమి ప్రభుత్వం రూ.10,000 ఇస్తామని హామీ ఇచ్చింది. అందుకు అనుగుణంగానే సీఎం హామీను అమలు చేసే దిశగా అడుగులు వేస్తూ ఉండడంతో వాలంటీర్లు ఆనందాన్ని వ్యక్తం చేస్తున్నారు. వేతనాలు పెంచడంతోపాటు వాలంటీర్లకు అదనపు విధులను అప్పగించేందుకు సీఎం చంద్రబాబు నాయుడు సిద్ధపడుతున్నట్లు తెలుస్తోంది. గత ప్రభుత్వం పెన్షన్ల పంపిణీ సేవలను మాత్రమే వాలంటీర్ ద్వారా వినియోగించుకుంది. కూటమి ప్రభుత్వం మాత్రం వీరికి మరికొన్ని విధులను అప్పగించేందుకు సిద్ధపడుతున్నట్లు తెలుస్తోంది. వాలంటీర్లుగా ఉన్న తమపై ప్రభుత్వం ఎటువంటి ప్రకటన చేయకపోవడం పట్ల ఈ నెల 29న రాష్ట్ర వ్యాప్తంగా వాలంటీర్లు కమ్యూనిస్టు పార్టీలతో కలిసి ఆందోళనకు సిద్ధమవుతున్నారు. ఈ నేపథ్యంలోనే ప్రభుత్వం వారికి అనుకూలంగా నిర్ణయాన్ని తీసుకున్నట్లు చెబుతున్నారు. సాంకేతిక కారణాల వల్ల ఏపీలో రెండు నెలల నుంచి వాలంటీర్లకు వేతనం చెల్లించడంలేదని, ఆ బకాయిల్ని వెంటనే విడుదల చేయాలని ఆర్థిక శాఖకు నివేదిక పంపించినట్లు గ్రామ, వార్డు వాలంటీర్లు, సచివాలయాల శాఖ సంచాలకులు ఎం.శివప్రసాద్ వెల్లడించారు. దీంతో వ‌లంటీర్ల స‌మ‌స్య ప‌రిష్కారం అయిన‌ట్టేన‌ని భావిస్తున్నారు. ఎన్నిక‌ల స‌మ‌యంలో ల‌క్ష మంది వ‌లంటీర్లు త‌మ త‌మ ఉద్యోగాల‌కు రాజీనామా చేశారు. వారి ప‌రిస్థితి మాత్రం అగ‌మ్య‌ గోచ‌రంగా మారింది. త‌మ‌ను తిరిగి విధుల్లోకి తీసుకోవాల‌ని అప్ప‌ట్లో వైసీపీ నాయ‌కుల మాట‌లు విని పొర‌పాటు చేశామ‌ని, మంత్రుల‌కు, అధికారుల‌కు, క‌లెక్ట‌ర్ల‌కు అప్ప‌ట్లో రాజీనామాలు చేసిన వ‌లంటీర్లు పెద్ద ఎత్తున విన‌తులు ఇచ్చారు. దీంతో త‌మ‌తో రాజీనామాలు చేయించిన వారిపై కేసులు పెట్టాల‌ని ప‌లువురు మంత్రులను కలిసి కోరారు.